Hakerlər iPhone Duo-nu satışa çıxarıldığı gün sındırıblar
Hakerlərdən ibarət Calif komandası “Apple” şirkətinin yeni qatlanan smartfonu iPhone Duo-da satışa çıxdığı gün jailbreak həyata keçirib. Bununla cihazın əməliyyat sistemindəki standart məhdudiyyətləri keçmək mümkün olub.
ENA.az xəbər verir ki, iOS 27.1 əməliyyat sistemi ilə işləyən cihazın sındırılması satışların başlamasından cəmi bir neçə saat sonra nümayiş etdirilib. Tədqiqatçılar sübut olaraq telefonun ekranında ikonların və vidcetlərin yerlərinin dəyişdirildiyini, interfeysə animasiya personajının əlavə olunduğunu göstərən video yayımlayıblar.
Jailbreak istifadəçiyə “Apple”ın standart proqram məhdudiyyətlərini aradan qaldırmağa, sistemə daha geniş giriş əldə etməyə və rəsmi mağazada olmayan tətbiqləri quraşdırmağa imkan verə bilər. Bununla belə, Calif komandası iPhone Duo üçün hazır jailbreak alətini ictimaiyyətə təqdim etməyib. Tədqiqatçılar gələcəkdə texnologiyanın iş prinsipini nümayiş etdirən materiallar yayımlaya biləcəklərini bildiriblər.
Bu hadisədən bir həftə əvvəl komanda iOS 27.0.1 ilə işləyən iPhone 18 Pro-da da jailbreak nümayiş etdirmişdi. Həmin sınaqda cihaz yenidən başladıldıqdan sonra da geniş sistem girişini qoruyub saxlamışdı. iPhone Duo üzrə nümayişin eyni xüsusiyyətə malik olub-olmadığı isə hələ məlum deyil.
Tədqiqatçı Stefan Esser əvvəlki sınaqda istifadə olunan boşluqların bir qisminin “Apple”a bildirildiyini, əksəriyyətinin isə iOS 27.2 beta versiyasında aradan qaldırıldığını deyib. Jailbreak hazırlanarkən süni intellektdən də istifadə olunduğu bildirilsə də, bunun texniki detalları açıqlanmayıb.
