GTA VI satışa çıxmamış 630 milyon dollar gəlir gətirib
“Grand Theft Auto VI” (GTA VI) videooyununun ilkin sifarişlərinin sayı 6,45 milyon nüsxəyə çatıb. Oyunun satışa çıxmasından əvvəl əldə olunan gəlirin təxminən 630 milyon dollar olduğu bildirilir.
ENA.az xəbər verir ki, “Sensor Tower” analitik şirkətinin qiymətləndirmələrinə görə, oktyabrın 20-nə olan vəziyyətə əsasən, ilkin sifarişlərin 74%-i “PlayStation 5” platformasının payına düşüb. Bu, təxminən 4,8 milyon nüsxə deməkdir. “Xbox Series X|S” platforması üzrə isə sifarişlərin sayı 1,66 milyon nüsxə təşkil edib.
“Rockstar Games” tərəfindən hazırlanan oyunun 19 noyabr 2026-cı ildə “PlayStation 5” və “Xbox Series X|S” konsolları üçün satışa çıxarılması planlaşdırılır. Standart versiyanın qiyməti 79,99 dollar, “Ultimate Edition” versiyasının qiyməti isə 99,99 dollardır.
Analitiklər GTA VI-nın ilin ən böyük oyun buraxılışlarından biri olacağını gözləyirlər. Oyunun satışa çıxmazdan əvvəl topladığı sifarişlərə baxmayaraq, göstərilən rəqəmlərin nəşriyyatçı tərəfindən açıqlanmış rəsmi satış statistikası deyil, analitik qiymətləndirməsi olduğu qeyd edilməlidir.
