Qızılın qiyməti artır – Fed-in faiz siyasəti ilə bağlı siqnallar gözlənilir (27.08.2026)
Qızılın qiyməti ABŞ-da büdcə kəsiri ilə bağlı narahatlıqlar və dolların zəifləyəcəyi gözləntilərinin təsiri ilə yüksəlişini davam etdirib. İnvestorların diqqəti Federal Ehtiyat Sisteminin (Fed) rəhbəri Kevin Uorşun çıxışına yönəlib.
ENA.az xəbər verir ki, “spot” qızılın bir unsiyasının qiyməti 0,8% artaraq 4 630,09 dollara, ABŞ qızıl fyuçersləri isə 0,7% yüksələrək 4 685,50 dollara çatıb.
Analitiklərin fikrincə, dolların zəifləyəcəyi ilə bağlı gözləntilər və ABŞ-ın büdcə kəsiri ilə bağlı narahatlıqlar orta müddətdə qızılın qiymətini dəstəkləməyə davam edə bilər.
Fed-in faiz siyasəti əsas gündəmdir
Bazar iştirakçıları Fed rəhbəri Kevin Uorşun bu həftə Cekson-Houl iqtisadi siyasət simpoziumunda edəcəyi çıxışdan pul siyasətinin gələcək istiqaməti ilə bağlı siqnallar gözləyirlər.
ABŞ-da iyul inflyasiyasının gözləntilərin əksinə olaraq dəyişməməsi və Fed-in 2%-lik hədəfindən yuxarı qalması faiz siyasəti ilə bağlı qeyri-müəyyənliyi artırıb.
CME FedWatch məlumatlarına görə, investorlar Fed-in sentyabrda faiz artımı ehtimalını 36,5%, dekabra qədər faiz artımı ehtimalını isə 72,7% səviyyəsində qiymətləndirirlər.
Qızıl faiz gəliri gətirmədiyi üçün yüksək faiz dərəcələri qiymətli metalın cəlbediciliyini azalda bilər. Əksinə, faizlərin aşağı salınacağı gözləntiləri qızıla tələbi gücləndirir.
Digər qiymətli metallardan gümüş 1,7%, platin 1,1%, palladium isə 0,5% bahalaşıb.
