İtaliyada rekord həcmdə şərab oğurluğu: 30 min şüşə aparılıb
İtaliyanın ən qədim şərab istehsalçılarından biri olan Marchesi Antinori şirkətinin Toskanadakı anbarından ümumi dəyəri 5 milyon avro olan təxminən 30 min şüşə şərab oğurlanıb. Financial Times nəşrinin qiymətləndirməsinə görə, bu hadisə təkcə İtaliyada deyil, dünyada da miqyasına və oğurlanan şərabın dəyərinə görə ən böyük belə hadisələrdən biri ola bilər.
Şirkətin nümayəndələrinin sözlərinə görə, hadisə oktyabrın 4-nə keçən gecə baş verib. Oğrular Antinori şirkətinin xarici müştərilərinə göndərmək üçün ən bahalı şərablarından ibarət böyük partiyanı hazırladığı vaxt Toskananın Kortona şəhərindəki anbara daxil olublar.
Maskalı yeddi nəfər siqnalizasiya sistemini söndürərək iki iri yük maşını ilə Toskana şərablarının qutularını aparıb. Oğurlanan məhsullar arasında Tignanello, Solaia və Guado al Tasso markalı şərablar var. Bu şərabların pərakəndə satış qiyməti bir şüşə üçün adətən 150–500 avro arasında dəyişir.
Oğurluq müşahidə kameralarına düşüb. Polis hadisəni araşdırır, lakin şübhəlilər hələ saxlanılmayıb. Marchesi Antinori şirkətinin baş icraçı direktoru Renzo Cotarella bildirib ki, oğurlanmış şərabların tapılacağına ümid edirlər.
“Ümid edirik ki, şərabları tapa biləcəyik. İki yük maşını elə-belə yoxa çıxa bilməz. Bu şərablar çox qiymətlidir. Belə böyük miqdarda məhsulu bütün dünyada diqqət çəkmədən necə satmağın mümkün olduğunu təsəvvür etmirəm”, – o deyib.
Son aylarda şərab istehsalçıları hədəfə çevrilib
İtaliyada şərab oğurluğu yeni hadisə deyil. Əvvəllər cinayətkarlar daha çox “Mişlen” ulduzlu restoranları və zəngin şərab kolleksiyaları olan məkanları hədəfə alırdılar.
Lakin 2026-cı ilin yayından etibarən oğruların diqqəti birbaşa şərab istehsal edən müəssisələrə yönəlib. Məsələn, Banfi di Montalcino şərab zavodu Piemontdakı anbarından 3 min şüşə Alta Langa şərabının oğurlandığını açıqlayıb. Şirkət nümayəndələri oğruların şüşələri diqqətlə seçdiyini və nə etdiklərini yaxşı bildiklərini vurğulayıblar.
Sentyabrda isə dörd nəfər Conterno Fantino şərab zavodundan 3 min şüşə Barolo şərabı oğurlayıb. Onlara bunun üçün cəmi üç saat lazım olub.
