İnsanabənzər robotların tədarükü 432% artıb – Çinin payı 95%-i keçib
2026-cı ilin ilk yarısında dünyada insanabənzər robotların tədarükü ötən ilin eyni dövrü ilə müqayisədə 432,1% artaraq 25 minə yaxınlaşıb.
ENA.az xəbər verir ki, “IDC”nin məlumatına görə, hesabat dövründə insanabənzər robot istehsalçılarının gəliri 740 milyon dolları ötüb. Bu, illik müqayisədə 322,7% artım deməkdir. Bir robotun orta qiyməti isə təxminən 29,6 min dollara düşüb.
Çin şirkətləri qlobal tədarükün 95%-dən çoxunu həyata keçirib. Eyni zamanda, dünya üzrə satılan robotların təxminən 78%-i Çinli müştərilər tərəfindən alınıb.
“IDC”nin məlumatına görə, ilk yarıda ən çox insanabənzər robot tədarük edən şirkət “Agibot” olub. Şirkət 8 600-dən çox robot sataraq qlobal bazarın təxminən 35%-nə sahib olub. İkinci yerdə təxminən 5 min robotla “Unitree” qərarlaşıb.
“IDC” 2030-cu ildə qlobal insanabənzər robot tədarükünün 750 min ədədi ötəcəyini proqnozlaşdırır. Hazırda robotların böyük hissəsi tədqiqat, təhsil, sərgi və dövlət məlumat mərkəzlərində istifadə olunur, lakin sənaye, logistika, pərakəndə və turizm sahələrində tətbiq dairəsi də genişlənir.
