Türk Hava Yolları Boeing-dən 150 təyyarə alacaq
Türkiyənin “Türk Hava Yolları” (THY) aviaşirkəti “Boeing” ilə 150-yə qədər 737 MAX təyyarəsini əhatə edən sifariş razılaşmasını rəsmiləşdirib.
ENA.az xəbər verir ki, razılaşmaya əsasən, THY 100 ədəd “Boeing 737-8” təyyarəsi üçün qəti sifariş verib, daha 50 “Boeing 737 MAX” təyyarəsi üçün isə opsion əldə edib. Sifariş 2025-ci ildən davam edən danışıqların yekununda rəsmiləşdirilib.
Bu, THY-nin “Boeing”ə verdiyi ən böyük tək dəhlizli təyyarə sifarişidir. Razılaşma şirkətə 737 MAX ailəsinin daha böyük modeli olan 737-10-a keçid imkanı da verir.
Yeni təyyarələrin THY-nin qısa və orta məsafəli uçuş şəbəkəsinin genişləndirilməsinə xidmət edəcəyi bildirilir. “Boeing 737-8” modelinin yanacaq sərfiyyatı və emissiyaları əvəz etdiyi təyyarələrlə müqayisədə 20%-ə qədər azalda bildiyi qeyd olunur.
