ABŞ seçkiləri və dolların ucuzlaşması qızılı bahalaşdırıb (04.11.2026)
ABŞ-da keçirilən aralıq seçkilərin ilkin nəticələrinin Demokratların Konqresin hər iki palatasında mövqelərini gücləndirdiyini göstərməsi qızılın qiymətinə müsbət təsir edib. Dolların və ABŞ dövlət istiqrazlarının gəlirliliyinin azalması fonunda qiymətli metal bahalaşıb.
ENA.az verir ki, qızılın bir unsiyasının qiyməti əvvəlki sessiyadakı cüzi enişi kompensasiya edərək 0,9%-dək artıb və 3 960 dolları ötüb.
İlkin səslərin hesablanması Demokratların həm Senatda, həm də Nümayəndələr Palatasında çoxluğu geri qaytarmaq uğrunda mübarizədə irəlidə olduğunu göstərir. Bazar iştirakçıları bu nəticələri Donald Tramp administrasiyasının növbəti iki il ərzində büdcə kəsirini artıracaq siyasət həyata keçirmək imkanlarının məhdudlaşması ehtimalı kimi qiymətləndirirlər.
Seçki nəticələri fonunda ABŞ dövlət istiqrazlarının gəlirliliyi müxtəlif müddətlər üzrə aşağı düşüb. Dolların əsas valyutalara qarşı məzənnəsini əks etdirən indeks isə 0,4%-dək geriləyərək son iki ayın ən böyük enişini qeydə alıb.
Oversea-Chinese Banking Corporation-ın strateqi Kristofer Vonq bildirib ki, bazarlar Demokratların güclü nəticəsinin Tramp administrasiyasının maliyyə siyasətini və büdcə xərclərini genişləndirmək imkanlarını nə dərəcədə məhdudlaşdıra biləcəyini qiymətləndirir. Bu gözləntilər qızılın qiymətinə dəstək verir.
Digər qiymətli metalların dinamikası isə fərqli olub. Gümüşün bir unsiyasının qiyməti 0,8% azalaraq 49,42 dollara düşüb, platin və palladium da cüzi ucuzlaşıb.
