Neft İran-ABŞ gərginliyinin artması fonunda bahalaşıb (18.08.2026)
Dünya bazarında neft qiymətləri İran və ABŞ arasında gərginliyin yenidən artması fonunda yüksəlib. Tehran danışıqların nəticəsiz qalacağı təqdirdə daha sərt hərbi mövqe tutacağı barədə xəbərdarlıq edib.
Məlumata görə, Brent markalı neftin oktyabr fyuçersləri 0,3% bahalaşaraq bir barel üçün 91,14 ABŞ dollarına yüksəlib. WTI markalı ABŞ xam neftinin qiyməti isə 42 sent artaraq 85,04 dollar təşkil edib.
WTI sessiyanın əvvəlində 1%-dən çox bahalaşaraq 85,37 dollara yüksəlib. Bu, ABŞ xam neftinin 31 iyuldan bəri qeydə aldığı ən yüksək qiymət olub. Brent isə əvvəlki sessiyada 30 iyuldan etibarən ən yüksək səviyyəyə çatıb.
Qiymət artımının əsas səbəbi İran və ABŞ arasında diplomatik prosesin yenidən mürəkkəbləşməsi olub. İran rəsmiləri müharibənin başa çatdırılmasına dair danışıqların nəticəsiz qalacağı halda ölkənin “tamamilə hücum xarakterli” hərbi mövqeyə keçə biləcəyi barədə xəbərdarlıq edib.
ABŞ isə mövcud atəşkəsin uzadılmasını gündəmdən çıxarıb. Bu vəziyyət Yaxın Şərqdən neft tədarükünün təhlükəsizliyi ilə bağlı narahatlıqları artırıb.
Hürmüz boğazı əsas risk olaraq qalır
Bazar iştirakçıları xüsusilə Hürmüz boğazında vəziyyəti izləyirlər. KCM-nin baş bazar analitiki Tim Uoter bildirib ki, ABŞ-İran münasibətləri getdikcə daha kövrək xarakter alır və boğazın yenidən açılmasına dair razılaşma hələ də görünmür.
Onun sözlərinə görə, regionda gəmi hərəkətləri də çox aşağı səviyyədə qalır. Bu isə enerji bazarında əlavə risk mükafatının formalaşmasına səbəb olur.
Hürmüz boğazında uzunmüddətli məhdudiyyətlərin yaranması qlobal neft tədarükü üçün ciddi risk yarada bilər. Bu səbəbdən İran-ABŞ münasibətlərində hər yeni gərginlik siqnalı neft qiymətlərində dərhal əks olunur.
Hazırda bazarın əsas diqqəti ABŞ-İran danışıqlarının taleyinə, atəşkəsin davam etdirilib-etdirilməyəcəyinə və Hürmüz boğazında gəmiçilik fəaliyyətinin bərpasına yönəlib.
