Zirvədə sabitlik, ortada silkələnmə: Depozit portfeli üzrə RENKİNQ

Azərbaycan bank sektorunda depozit portfeli üzrə zirvədə dəyişiklik yoxdur – bazarın iki nəhəngi mövqelərini qoruyur. ABB və Kapital Bank depozit bazarının əsas yükünü daşımaqda davam edir və hər iki bankın portfelində artım müşahidə olunur. Bu isə müştəri etimadının hələ də iri oyunçuların tərəfində olduğunu göstərir. Xüsusilə Kapital Bankın 206.6 milyonluq artımı onun kütləvi müştəri bazasına və güclü retail strategiyasına söykəndiyini göstərir. ABB isə daha konservativ, lakin stabil artım trayektoriyasını qoruyur.

Lakin üçüncü yerdə qərarlaşan PAŞA Bank üçün eyni sözləri demək çətindir. Bankın depozit portfeli ciddi şəkildə azalıb. Bu azalma təsadüfi deyil – iri korporativ müştərilərlə işləyən banklar üçün depozit dinamikası daha dəyişkən olur və burada hər bir iri müştərinin qərarı ümumi mənzərəni dəyişə bilər.

Orta seqmentdə isə daha maraqlı proseslər gedir. Xalq Bank, Bank Respublika, AccessBank və Yelo Bank kimi oyunçuların əksəriyyətində azalma var. Bu, bazarda orta ölçülü bankların depozit uğrunda mübarizəsinin sərtləşdiyini göstərir. Müştərilər ya daha böyük banklara yönəlir, ya da alternativ maliyyə alətlərinə maraq artır.

Bunun fonunda bəzi banklar səssiz şəkildə irəliləyir. Məsələn, Bank of Baku, Ziraat Bank Azərbaycan və Azərbaycan Sənaye Bankı depozit portfelini artırmağı bacarıb. Bu artım onların daha çevik strategiya seçdiyini və depozitlərə daha yüksək faizlər vəd etməsi ilə bağlıdır.

PAŞA Bank (-641.4 mln), Bank Respublika (-203 mln) kimi iri oyunçuların ciddi azalma göstərməsi artıq texniki yox, strateji dəyişikliklərə işarə edir. Bu banklardan böyük korporativ depozitlərin çıxışı artıq biznesin hədəfləri ilə bağlıdır.

Mənfi zonada olan bankların çoxluğu (10-dan çox bank) onu göstərir ki, bazarda depozitlər sadəcə artmır – yer dəyişir. Yəni pul sistem daxilində qalır, amma banklar arasında yenidən bölüşdürülür.